अकलुज बसस्थानकात दुपारी गडबडीत १० तोळे सोन्याचे दागिने चोरी; चार सराईत महिला आरोपींच्या मुसक्या आवळल्या
महर्षि डिजीटल न्यूज/सागर खरात
अकलुज : दिनांक ०४ ऑगस्ट २०२५ रोजी दुपारी सुमारे १.३० वाजता अकलुज बसस्थानकात बसमध्ये चढताना पुण्याला जाण्यासाठी निघालेल्या एका महिलेकडून गर्दीचा फायदा घेत अज्ञात व्यक्तीने तिच्या पर्समधून सुमारे १० लाख रुपये किंमतीचे १० तोळे वजनाचे सोन्याचे बांगड्या व गंठण चोरल्याची घटना घडली. या प्रकरणी अकलुज पोलीस ठाण्यात गु.र.नं. ५४५/२०२५, भा.दं.वि. कलम ३०३(२) अंतर्गत गुन्हा दाखल करण्यात आला आहे.
गुन्हा घडल्यानंतर तात्काळ गुन्हे प्रकटीकरण पथकाने अकलुज बसस्थानक, अकलुज नगरपरिषद परिसर तसेच रस्त्यावरील दुकानांतील सीसीटीव्ही फुटेजची पाहणी केली. यामध्ये चार संशयित महिला रिक्षाने टेंभुर्णीकडे जाताना आढळून आल्या. पोलिसांनी तत्काळ अकलुज ते टेंभुर्णी दरम्यान तसेच टेंभुर्णी शहरातील एकूण ३० ते ३५ सीसीटीव्ही फुटेज तपासले आणि तांत्रिक विश्लेषणाद्वारे आरोपींचा शोध घेतला.
शोध मोहिमेदरम्यान टेंभुर्णी येथे पळून जाण्याच्या तयारीत असलेल्या चार महिलांना पोलिसांनी शिताफीने अटक केली. अटक करण्यात आलेल्या महिलांची नावे पुढीलप्रमाणे :
- एकता कैलास उपाध्ये (वय २४, रा. बापुनगर, कलबुर्गी, सध्या फुलेनगर, येरवडा, पुणे)
- ननीता दिनेश कांबळे (वय ३५, रा. फुलेनगर, येरवडा, पुणे)
- सुनिता शाखा सकट (वय ४५, रा. फुलेनगर, येरवडा, पुणे)
- आरती मेघराज उपाध्य (वय ३०, रा. फुलेनगर, येरवडा, पुणे)
तपासादरम्यान चौघींनी गुन्ह्याची कबुली दिली असून, त्यांच्याकडून सदर गुन्ह्यातील १० तोळे व यापूर्वी अकलुज बसस्थानकात झालेल्या तीन वेगवेगळ्या चोरीच्या घटनांमधील चार तोळे अशा एकूण १४ तोळे वजनाचे आणि सुमारे १४ लाख रुपये किंमतीचे सोन्याचे दागिने हस्तगत करण्यात आले आहेत.
सदर आरोपी महिला या सराईत गुन्हेगार असून, त्यांच्या विरोधात अलंद पोलीस ठाणे (कर्नाटक), वाई (जिल्हा सातारा), वारजे माळवाडी व शिवाजीनगर (पुणे शहर) या ठिकाणी विविध गुन्हे दाखल असल्याचे निष्पन्न झाले आहे.
ही यशस्वी कारवाई सोलापूर ग्रामीणचे पोलीस अधीक्षक अतुल कुलकर्णी, अपर पोलीस अधीक्षक प्रितम यावलकर, अकलुज विभागाचे उपविभागीय पोलीस अधिकारी नारायण शिरगावकर यांच्या मार्गदर्शनाखाली अकलुज पोलीस निरीक्षक निरज उबाळे यांच्या नेतृत्वाखाली करण्यात आली. या कारवाईत सहायक पोलीस निरीक्षक योगेश लंगुटे, विक्रम साळुंखे, पोलीस उपनिरीक्षक संजय रेगुडे, पो.ह. सुहास क्षिरसागर, शिवकुमार मदभावी, विक्रम घाटगे, विनोद साठे, सिध्दु कंटोळी, बबलू गाडे, मपोहे मदाकिनी चव्हाण, चालक राहुल नागरगोजे, पोलीस अमलदार सोमनाथ माने, रणजित जगताप, प्रविण हिंगणगावकर व महिला पोलीस अमलदार पुनम शिंदे यांनी विशेष मेहनत घेतली.
ही कारवाई अकलुज पोलिसांसाठी मोठे यश ठरले असून, बसस्थानक परिसरातील चोरीच्या घटनांना रोखण्यासाठी हा तपास एक महत्त्वपूर्ण पाऊल ठरले आहे.
