हरवलेला मोबाईल आणि सापडली प्रामाणिकतेची नवी ओळख! नातेपुते नगरपंचायतीच्या कर्मचाऱ्यांचा आदर्शवत प्रामाणिकपणा
महर्षि डिजीटल न्यूज / सागर खरात
नातेपुते : सरकारी सेवेत प्रामाणिकता आणि जबाबदारी किती महत्त्वाची असते याचा उत्तम दाखला नातेपुते नगरपंचायतीच्या आरोग्य विभागाने पुन्हा एकदा घालून दिला आहे. अश्विनी राहुल काळे यांचा हरवलेला मोबाईल आरोग्य विभागातील कर्मचारी रंजना बाबर यांच्या हाताला सापडला आणि त्यांनी कोणताही मोह न बाळगता तो थेट कार्यालयात जमा करून आपली कर्तव्यनिष्ठा सिद्ध केली.
सदर मोबाईल रस्त्यावर किंवा सार्वजनिक जागेत सापडल्यास अनेकदा तो मालकापर्यंत पोहोचण्याची शक्यता कमी असते. मात्र रंजना बाबर यांनी सापडलेली वस्तू त्वरित आरोग्य विभाग प्रमुख संदीप काळे यांच्या ताब्यात दिली. त्यानंतर विभाग प्रमुखांनी अधिकृत प्रक्रिया पूर्ण करत मोबाईलची ओळख पटवली आणि त्याचे मालक असलेल्या अश्विनी राहुल काळे यांना तो सुखरूप परत केला.
ही संपूर्ण प्रक्रिया पारदर्शक, शिस्तबद्ध आणि नागरीक-केंद्रित व्यवस्थापनाचे उत्तम उदाहरण ठरली आहे.
हरवलेली वस्तू शोधून योग्य मालकापर्यंत पोहोचवणे ही आजच्या काळातील दुर्मिळ बाब मानली जाते. त्यामुळेच रंजना बाबर यांच्या प्रामाणिकतेचे आणि सजग नागरिकत्वाचे सर्वत्र कौतुक होत आहे.
मोबाईल सुपूर्त करताना रंजना बाबर, संदीप काळे, अशोक जावरे, भानुदास काळे, विकास पांढरे, चैतन्य पागे, संभाजी अवघडे, रोहित कवितके, अनिल गुणावरे आणि सूरज कांबळे उपस्थित होते.
नगरपंचायतीतून अशा प्रकारचे आदर्श काम समोर येत असल्याने नागरिकांचा विश्वास अधिक दृढ होत असल्याचेही मत व्यक्त होत आहे. नातेपुते नगरपंचायतीच्या वतीने प्रामाणिकतेचा उत्तम आदर्श घालून दिल्याबद्दल मुख्याधिकारी विकास शिंगाडे यांनी त्यांचे अभिनंदन केले.
