शेतकरी हिताला प्राधान्य : सहकार महर्षी कारखान्याचा ऊस दर ₹३,००५ प्रती टन जाहीर
महर्षि डिजीटल न्यूज
अकलूज : सहकार महर्षी शंकराव मोहिते पाटील सहकारी साखर कारखान्याने ऊस उत्पादक शेतकऱ्यांना मोठा दिलासा देत प्रती मे. टन ऊस दर ₹३,००५/- जाहीर केला आहे. कारखान्याच्या मुख्य प्रवेशद्वारावर आज ऊस दराबाबत वातावरण तापले असतानाच, व्यवस्थापनाने सकारात्मक निर्णय घेतल्याने परिस्थिती शांत झाली.
कारखान्याचे चेअरमन जयसिंह मोहिते पाटील व व्यवस्थापनाने शेतकऱ्यांच्या हिताचा विचार करून पहिली उचल ₹३,००५/- (तीन हजार पाच रुपये) प्रती टन देण्याचा निर्णय घेतला. या निर्णयाबाबत अधिकृत पत्र देऊन माहिती जाहीर करण्यात आली.
या वेळी कारखान्याचे व्हाईस चेअरमन शंकराव माने देशमुख, तज्ज्ञ संचालक प्रकाशराव पाटील, संचालक मंडळ सदस्य रामचंद्र ठवरे, गोविंद पवार, विराज निंबाळकर, विजय पवार, पांडुरंग एकतपुरे, कार्यकारी संचालक राजेंद्र चौगुले तसेच शेती अधिकारी चव्हाण उपस्थित होते.
याप्रसंगी संचालक प्रकाशराव पाटील यांनी सांगितले की, सहकार महर्षी शंकराव मोहिते पाटील यांनी घालून दिलेल्या तत्त्वांनुसार तसेच राज्याचे माजी उपमुख्यमंत्री विजयसिंह मोहिते पाटील व कारखान्याचे चेअरमन जयसिंह मोहिते पाटील यांच्या मार्गदर्शनाखाली कारखान्याची वाटचाल सुरू आहे. शेतकऱ्यांना वेळेवर व योग्य दर देण्याची भूमिका कारखान्याने कायम ठेवली आहे, असे त्यांनी स्पष्ट केले.
कारखान्याने आजअखेर ३ लाख ७० हजार टन ऊस गाळप पूर्ण केले आहे. ३१/११ पर्यंत गाळप झालेल्या उसासाठी ₹२,८५०/- हप्ता शेतकऱ्यांच्या बँक खात्यात जमा करण्यात आला असून, तोडणी व वाहतुकीची बिलेही अदा करण्यात आली आहेत. यापूर्वी गाळप झालेल्या तसेच पुढे येणाऱ्या प्रत्येक टन ऊसास ₹३,००५/- प्रती टन असा दर लागू राहणार असल्याची माहिती कारखाना व्यवस्थापनाने दिली.
या निर्णयामुळे ऊस उत्पादक शेतकऱ्यांमध्ये समाधानाचे वातावरण निर्माण झाले असून, कारखान्याच्या वेळेवर घेतलेल्या निर्णयाचे स्वागत होत आहे.
