कुर्डूतील अवैध मुरूम उत्खननाचा मुद्दा थेट दिल्लीत; खासदार मोहिते-पाटील यांच्या पाठपुराव्याने मुरूम माफियांचे धाबे दणाणले
महर्षि डिजीटल न्यूज
नवी दिल्ली : सोलापूर जिल्ह्यातील माढा तालुक्यातील कुर्डू येथील वनविभागाच्या जमिनीवर सुरू असलेल्या बेकायदेशीर मुरूम उत्खननाचा गंभीर प्रश्न खासदार धैर्यशील मोहिते-पाटील यांनी थेट दिल्ली दरबारी पोहोचवला आहे. केंद्रीय वन विभागाचे सचिव तन्मय कुमार यांची भेट घेऊन त्यांनी या प्रकरणावर तातडीने लक्ष घालण्याची मागणी केली आहे, ज्यामुळे स्थानिक मुरूम माफियांचे धाबे दणाणले आहेत.
गेल्या अनेक दिवसांपासून कुर्डू येथे मोठ्या प्रमाणावर मुरूम माफिया सक्रिय आहेत. वनविभागाचे कर्मचारी, रेंज फॉरेस्ट ऑफिसर आणि वनरक्षक मोडनिंब यांनी या अवैध उत्खननाला आळा घालण्यासाठी वारंवार प्रयत्न केले. कुर्डूवाडी पोलीस ठाण्यात गुन्हा दाखल करण्याची मागणीही करण्यात आली, मात्र पोलिसांनी याकडे हेतुपुरस्सर दुर्लक्ष केल्याचा आरोप आहे. स्थानिक पोलिसांच्या या भूमिकेमुळे वनविभागाचे अधिकारी हतबल झाले होते. त्यामुळेच वनरक्षक मोडनिंब यांनी सोलापूर ग्रामीण पोलीस अधीक्षकांकडे लेखी तक्रार देऊनही कोणताही परिणाम झाला नाही.
अखेरीस, या प्रकरणाची गंभीर दखल घेत खासदार धैर्यशील मोहिते-पाटील यांनी स्वतः यात लक्ष घातले. त्यांनी या बेकायदेशीर उत्खननामुळे पर्यावरणाची होणारी हानी आणि राज्याच्या वन विभागाला होणारा महसुली तोटा याची माहिती घेतली. त्यानंतर थेट दिल्ली गाठून केंद्रीय वन सचिव तन्मय कुमार यांची भेट घेतली. या भेटीत त्यांनी संपूर्ण वस्तुस्थिती त्यांच्यासमोर मांडली आणि अवैध उत्खनन तात्काळ थांबवून दोषींवर कठोर कारवाई करण्यासाठी राज्य सरकारला आवश्यक निर्देश देण्याची मागणी केली.
खासदार मोहिते-पाटील यांच्या या धडक भूमिकेमुळे स्थानिक पातळीवर निष्क्रिय असलेल्या प्रशासनावर आता दिल्लीतून दबाव येण्याची शक्यता आहे. केंद्रीय वन विभागाकडून या प्रकरणी तातडीने चौकशीचे आदेश दिले जातील अशी अपेक्षा आहे. त्यामुळे, मुरूम उत्खनन करणाऱ्या माफियांचे जाळे उघडकीस येऊन त्यांच्यावर कठोर कारवाई होण्याची शक्यता बळावली आहे. या घडामोडींमुळे माढा तालुक्यासह सोलापूर जिल्ह्याच्या राजकीय वर्तुळात मोठी चर्चा सुरू झाली आहे.
