कार्यकर्त्यांची आमदार राम सातपुते साठी व सातपुतेंची विजयसिंह मोहिते पाटील यांच्यासाठी कृतज्ञता
महर्षि डिजीटल न्यूज / सागर खरात
अकलूज : आमदार राम सातपुते यांनी आयोजित केलेल्या कृतज्ञता मेळाव्यात तालुक्यातील विविध पदाधिकारी व कार्यकर्त्यांनी त्यांच्याविषयी कृतज्ञता व्यक्त केली तर आमदार सातपुते यांनी भारतीय जनता पक्षा बरोबरच राज्याचे माजी उपमुख्यमंत्री विजयसिंह मोहिते पाटील यांच्याबाबत कृतज्ञता व्यक्त केली.
सोलापूर लोकसभेसाठी आमदार राम सातपुते यांना भारतीय जनता पक्षाने उमेदवारी दिल्यानंतर माळशिरस तालुक्यातील जनते विषयी कृतज्ञता व्यक्त करण्यासाठी आमदार सातपुते यांनी धर्मपत्नी संस्कृती सातपुते यांच्यासह मांडवी येथील आपल्या “श्रीराम” या निवासस्थानी कृतज्ञता मिळावा आयोजित केला होता. मेळाव्यासाठी तालुक्यातून विविध पदाधिकारी व कार्यकर्ते उपस्थित होते.
यावेळी बोलताना आमदार राम सातपुते म्हणाले, माळशिरस तालुक्याने मला खूप प्रेम दिले आहे. एका ऊसतोड कामगाराच्या मुलाला या तालुक्याने आमदार होण्याचा मान दिला. यामध्ये राज्याचे माजी उपमुख्यमंत्री विजयसिंह मोहिते पाटील व मोहिते पाटील परिवाराचे मोलाचे योगदान आहे. या प्रेमाला उतराई होण्यासाठी आपण माळशिरस तालुक्याच्या विकासासाठी अहोरात्र कष्ट घेऊन तळहाताच्या फोडाप्रमाणे येथील नागरिकांची सेवा केली आहे.
भारतीय जनता पक्ष व उपमुख्यमंत्री देवेंद्र फडणवीस यांनी वेळोवेळी निधी उपलब्ध करून दिल्याने तालुक्यातील बरेच प्रश्न मार्गी लावण्यात यश मिळाले असल्याचे सांगून यापुढेही माळशिरस तालुक्याचा विकास थांबणार असल्याचे त्यांनी आवर्जून सांगितलं तसेच पुढील पन्नास वर्षासाठी आपण हा तालुका दत्तक घेत असल्याचेही त्यांनी यावेळी जाहीर केले.
तालुक्यातून आलेल्या भारतीय जनता पक्षाच्या पदाधिकाऱ्यांसह विविध पक्षाच्या पदाधिकाऱ्यांनी आमदार राम सातपुते यांच्या कार्याचे कौतुक करून त्यांना सोलापूर लोकसभेसाठी शुभेच्छा दिल्या. यावेळी खासदार रणजितसिंह नाईक निंबाळकर हेही उपस्थित होते.
