रोटरी क्लब अकलूजच्या अध्यक्षपदी केतन बोरावके, सचिवपदी अजिंक्य जाधव : पदग्रहण सोहळा उत्साहात संपन्न

महर्षि डिजीटल न्यूज 

अकलूज : रोटरी क्लब अकलूजच्या अध्यक्षपदी केतन बोरावके तर सचिवपदी अजिंक्य जाधव यांची निवड करण्यात आली. त्यांच्या पदग्रहण सोहळ्याचा समारंभ अकलूज येथील कृष्णप्रिया मल्टी फंक्शन हॉलमध्ये मोठ्या उत्साहात संपन्न झाला.

कार्यक्रमाची सुरुवात राष्ट्रगीत आणि तुळशीच्या रोपाला पाणी घालून पर्यावरणपूरक पद्धतीने झाली. यावेळी मावळत्या अध्यक्षा प्रिया नागणे व सचिव मनीष गायकवाड यांनी नूतन अध्यक्ष व सचिवांकडे चार्टर, डाँग बेल आणि कॉलर सोपवून सूत्रे सुपूर्त केली.

या कार्यक्रमात माजी प्रांतपाल मोहन पालेशा, प्रांतपाल जयेश पटेल, तसेच सहाय्यक प्रांतपाल डॉ. कैलास करांडे हे मान्यवर प्रमुख उपस्थित होते. त्यांच्याच हस्ते नव्या संचालक मंडळाला रोटरी पिन प्रदान करत औपचारिक शुभेच्छा देण्यात आल्या.

कार्यक्रमास सांगोला, टेंभुर्णी, पंढरपूर, मोडनिंब, सातारा, पाचगणी, सराटी डिलाईट आदी क्लब्सचे पदाधिकारी आणि सदस्य मोठ्या संख्येने उपस्थित होते. याशिवाय डॉक्टर्स, इंजिनियर्स, पत्रकार, समाजसेवक व व्यावसायिक यांचीही लक्षणीय उपस्थिती होती.

या प्रसंगी डॉ. कैलास करांडे यांनी प्रांतपाल डॉ. सुधीर लातूरे यांचा संदेश वाचून दाखवला. सीए. नितीन कुदळे यांनी मोहन पालेशा यांच्या कार्यप्रवासाचे विवेचन केले, तर प्रवीण कारंडे यांनी जयेश पटेल यांच्या सामाजिक कार्यावर प्रकाश टाकला.

“घरपण हरवू नका…” – मोहन पालेशा यांचे भावस्पर्शी मार्गदर्शन
प्रमुख अतिथी मोहन पालेशा यांनी आपले मनोगत मांडताना समाजातील वाढती संवेदनशीलता, घरातील संवादाची उणीव आणि वृद्धाश्रमांची गरज ही चिंतेची बाब असल्याचे सांगितले. “आभाळभर देणं नको, ओंजळभर तरी द्या… श्रमानंद जपा,” अशा शब्दांत त्यांनी उपस्थितांच्या मनाला स्पर्श करणारे विचार मांडले. त्यांच्या कविता, गोष्टी आणि अनुभवांनी सभागृहातील वातावरण भावनिक व मंत्रमुग्ध झाले.

विशेष अतिथी जयेश पटेल यांनी रोटरीच्या जागतिक कार्याचा आढावा घेत, “पर्यावरण, शांतता, शिक्षण, महिला सक्षमीकरण या क्षेत्रांत रोटरी कार्यरत आहे,” असे नमूद करत समाजातील सामूहिक सहभागाचे महत्त्व अधोरेखित केले.

संगणक भेट, स्मृतिचिन्ह सन्मान व वृत्तपत्र प्रकाशन
कार्यक्रमात जिल्हा परिषद शाळा वाघोली यांना विद्यार्थ्यांसाठी संगणक संच भेट देण्यात आला. ‘रोटरी अकलूज चक्र’ या वार्तापत्राचे प्रकाशन मान्यवरांच्या हस्ते झाले. तसेच विशेष सहकार्याबद्दल डॉ. श्रीकांत देवडीकर, नवीनचंद फडे, प्रदीप जाधव (सासवड माळी शुगर), मनशक्ती सेवा केंद्रातील साधक यांचा गौरव करण्यात आला.
शैक्षणिक यश मिळवलेल्या रोटरी सदस्यांच्या मुलांपैकी दीपाली शेंडगे, श्रुती फडे, अर्णव गांधी, मल्हार कुदळे यांचा सन्मान करण्यात आला.
सीए. नितीन कुदळे यांना ‘रोटरी अवेन्यू ऑफ सर्विस’ या राष्ट्रीय पुरस्काराने गौरवण्यात आले.

शेवग्याच्या बियांचे वाटप आणि नवा संकल्प
कार्यक्रमाच्या शेवटी निसर्गपूरक जीवनशैली आणि उत्पन्नवाढीचा संदेश देत मोरिंगा जातीच्या शेवग्याच्या बियांचे वाटप करण्यात आले.

मावळत्या अध्यक्षा रो. प्रिया नागणे यांनी स्वागत व मनोगत व्यक्त करत सहकार्याबद्दल कृतज्ञता व्यक्त केली. मनीष गायकवाड यांनी गतवर्षीच्या कार्याचा आढावा घेतला.
नूतन अध्यक्ष केतन बोरावके यांनी येत्या वर्षातील सामाजिक उपक्रमांची रूपरेषा मांडून सर्वांच्या सहकार्याची अपेक्षा व्यक्त केली.

सूत्रसंचालन अ‍ॅड. प्रवीण कारंडे आणि गजानन जवंजाळ यांनी तर आभार प्रदर्शन नूतन सचिव अजिंक्य जाधव यांनी केले.