अल्पवयीन मुलीवर अत्याचारप्रकरणी तिघा आरोपींना २० वर्षांची सश्रम कारावासाची शिक्षा ; वेळापुरातील पीडीतेला मिळाला न्याय

महर्षि डिजीटल न्यूज 

अकलूज : वेळापूर पोलीस ठाण्याच्या गुन्हा र. नं. ३५५/२०२१ अन्वये दाखल झालेल्या अत्याचारप्रकरणात माळशिरस येथील विशेष न्यायालयाने आज महत्त्वाचा निकाल देत तीनही आरोपींना २० वर्षांची सश्रम कारावास आणि दंडाची शिक्षा ठोठावली आहे.

सदर प्रकरणात आरोपी १) युवराज प्रकाश गोडसे, २) रणजित दत्तात्रय कोळेकर (दोघे रा. उघडेवाडी, ता. माळशिरस) आणि ३) रोहन दत्तात्रय भोसले (रा. खंडाळी, ता. माळशिरस, जि. सोलापुर) या तिघांविरुद्ध भा.द.वि. कलम ३७६, ३७६(A), ३५४, ५०६, ३४ तसेच अॅट्रोसिटी अॅक्ट कलम ३(१)(W), ३(२)(V), ३(२)(va) व पोक्सो कायदा कलम ४, ८, १२, १७ प्रमाणे गुन्हा दाखल करण्यात आला होता.

या गुन्ह्याचा तपास तत्कालीन उपविभागीय पोलीस अधिकारी डॉ. बसवराज शिवपूजे यांनी केला असून त्यांना सपोफौ गणेश निंबाळकर यांनी सहकार्य केले. या तपासात पुरावे गोळा करून न्यायालयात दोषारोपपत्र दाखल करण्यात आले.

खटल्यादरम्यान एकूण १३ साक्षीदारांची साक्ष घेण्यात आली. यामध्ये पिडीता, तिची आई आणि ओळख परेड घेणारे कार्यकारी दंडाधिकारी यांच्या साक्षी निर्णायक ठरल्या. आरोपी क्रमांक ३ रोहन दत्तात्रय भोसले याची ओळख परेडही यशस्वीरीत्या पार पडली.

मा. विशेष न्यायाधीश श्री. ताम्हाणेकर, माळशिरस न्यायालयाने तपासातील पुरावे व साक्षींवर विश्वास ठेवत आरोपींना प्रत्येकी २० वर्षांचा सश्रम कारावास आणि दंडाची शिक्षा सुनावली.

या खटल्यात सरकारतर्फे श्री. मेंढेगिरी, श्री. ढवळे आणि श्री. संग्राम पाटील यांनी सरकारी वकिल म्हणून प्रभावी मांडणी केली.
तसेच श्री. संतोष वाळके (उपविभागीय पोलीस अधिकारी, अकलूज) आणि श्री. भाऊसाहेब गोसावी (स.पो.नि., वेळापूर पोलीस ठाणे) यांनी संपूर्ण खटल्याच्या मार्गदर्शनाची जबाबदारी पार पाडली.

कोर्ट पैरवी अधिकारी पो.स.ई. विजय जाधव,
अंमलदार पोहेकॉ/१७१८ कदम आणि पोकॉ/१०५१ काटे (वेळापूर पोलीस ठाणे) यांनी कोर्टातील प्रक्रिया काटेकोरपणे पार पाडली.

या निकालामुळे वेळापूर पोलीस ठाणे व अकलूज उपविभागीय पोलिसांच्या तपासकार्याला मोठे यश मिळाले असून, न्याय मिळवून देण्याच्या त्यांच्या प्रयत्नांचे सर्वत्र कौतुक होत आहे.