अकलूजची बाजार समिती राज्यात आदर्श; वसंतदादा पाटील स्मृती पुरस्काराने मिळाला मानाचा मुकुट
महर्षि डिजीटल न्यूज
अकलूज : महाराष्ट्र राज्य बाजार समिती सहकारी संघ मर्या., पुणे यांच्या वतीने दिला जाणारा वसंतदादा पाटील स्मृती पुरस्कार यंदा अकलूज कृषी उत्पन्न बाजार समितीला प्रदान करण्यात आला. महाराष्ट्रातील उत्कृष्ट कार्य करणाऱ्या बाजार समितींना हा मानाचा सन्मान देण्यात येतो.
हा पुरस्कार महाराष्ट्र राज्य बाजार समिती सहकारी संघाचे सभापती प्रवीणकुमार नाहाटा यांच्या शुभहस्ते बाजार समितीचे सभापती मदनसिंह मोहिते पाटील, संचालक बाबुराव कदम, बाळासाहेब माने देशमुख, मारूतराव रुपनवर, शिवाजी चव्हाण, नितीन सावंत आणि सचिव राजेंद्र काकडे यांनी स्वीकारला.
स्थापनेपासूनच अकलूज बाजार समितीने शेतकरी व बाजार घटकांच्या हिताचे निर्णय घेत सातत्याने प्रगती साधली आहे. बदलत्या काळानुसार आधुनिकीकरणाचा स्वीकार करत विविध उपक्रम राबवले जात आहेत. पारदर्शक व स्वच्छ कारभारामुळेच अलीकडेच पुणे येथील पणन संचालक कार्यालयाच्या स्मार्ट प्रकल्पात अकलूज बाजार समितीला राज्यात आठवा क्रमांक मिळाला होता.
या यशामागे माजी उपमुख्यमंत्री विजयसिंह मोहिते पाटील आणि सहकार महर्षी कारखान्याचे चेअरमन जयसिंह मोहिते पाटील यांचे मार्गदर्शन महत्त्वाचे ठरले आहे. तसेच सभापती मदनसिंह मोहिते पाटील, उपसभापती, संचालक मंडळ, सचिव, शेतकरी, व्यापारी व कर्मचारी यांच्या एकत्रित प्रयत्नांमुळे अकलूज बाजार समिती आज राज्यातील आदर्श बाजार समिती म्हणून नावारूपास आली आहे.
