मोहिते महाविद्यालयात ‘सृजनरंग महोत्सव २०२५’ ला उत्साहात सुरुवात ; युवानेते सयाजीराजे मोहिते-पाटील यांच्या हस्ते उद्घाटन
महर्षि डिजीटल न्यूज
अकलूज : शिक्षण प्रसारक मंडळ संचलित शंकरराव मोहिते महाविद्यालयात ‘सृजनरंग महोत्सव २०२५’ ला उत्साहात सुरुवात झाली आहे. या महोत्सवाचे उद्घाटन युवानेते चि. सयाजीराजे संग्रामसिंह मोहिते-पाटील यांच्या शुभहस्ते करण्यात आले. विद्यार्थ्यांमधील सुप्त कलागुणांना वाव देण्यासाठी आणि त्यांना प्रोत्साहन देण्यासाठी या महोत्सवाचे आयोजन करण्यात आले आहे.
महाविद्यालयात शिक्षणाबरोबर विद्यार्थ्यांच्या सृजनशीलतेला वाव मिळावा, या उद्देशाने बाॅक्स विकेट क्रिकेट स्पर्धा (मुले व मुली), व्हिडिओ रिल मेकिंग, मोबाईल फोटोग्राफी, मेहेंदी स्पर्धा, वकृत्व स्पर्धा, निबंध स्पर्धा, पेपर प्रेझेंटेशन, आणि प्रोजेक्ट सादरीकरण अशा विविध स्पर्धांचे आयोजन करण्यात आले आहे.
हा महोत्सव दि. १४ फेब्रुवारी ते २१ फेब्रुवारी या कालावधीत आयोजित करण्यात आला आहे. विद्यार्थ्यांच्या कलागुणांना चालना देत त्यांच्या व्यक्तिमत्त्वाचा विकास करण्याचे महत्त्वाचे उद्दिष्ट या महोत्सवामागे आहे.
उद्घाटन सोहळ्याला महाविद्यालयाचे प्राचार्य डॉ.शिवप्रसाद टिळेकर, महाविद्यालय विकास समितीचे सदस्य डॉ.हणमंत आवताडे, डॉ.सतिष देवकर, ज्युनियर विभाग पर्यवेक्षक प्रा.आबासाहेब शेंडगे, क्रिडा विभाग प्रमुख प्रा.अरविंद वाघमोडे यांच्यासह शिक्षकवृंद आणि विद्यार्थी मोठ्या संख्येने उपस्थित होते.
युवानेते सयाजीराजे मोहिते-पाटील यांनी विद्यार्थ्यांना मार्गदर्शन करताना ‘स्पर्धांमधील सहभाग तुम्हाला आत्मविश्वास आणि ज्ञान देते. याचा उपयोग भविष्यातील यशासाठी होतो,’ असे प्रतिपादन केले.
‘सृजनरंग महोत्सव २०२५’ ला विद्यार्थ्यांचा उत्स्फूर्त प्रतिसाद मिळत आहे. विविध स्पर्धांमध्ये विद्यार्थी आपापल्या कलेचा आविष्कार सादर करत आहेत. महाविद्यालयात सृजनशीलतेची रंगतदार मेजवानी अनुभवायला मिळत आहे.
