महर्षि डिजीटल न्यूज | सागर खरात
अकलूज : शंकरनगर (ता. माळशिरस) येथे रामनवमीचा उत्सव मोठ्या भक्तीमय आणि उत्साही वातावरणात साजरा करण्यात आला. शंकरनगर येथील मारुती मंदिरात विविध धार्मिक कार्यक्रमांचे आयोजन करण्यात आले होते. या वेळी पूजा कृषी उत्पन्न बाजार समितीचे सभापती मदनसिंह मोहिते पाटील व सौ. कांचनमालादेवी मोहिते पाटील यांच्या हस्ते विधिवत पार पडली.
उत्सवानिमित्त परिसरातील ग्रामस्थ व भक्त मोठ्या संख्येने उपस्थित होते. प्रभू श्रीरामाच्या जन्मोत्सवानिमित्त पारंपरिक पद्धतीने “रामजन्म” सोहळा साजरा करण्यात आला. यावेळी सर्व भक्तांनी एकत्रितपणे प्रभू श्रीरामाचा पाळणा गात भक्तिमय वातावरण निर्माण केले. मंदिर परिसरात धार्मिक उत्साहाचे वातावरण पाहायला मिळाले.
कार्यक्रमानंतर उपस्थितांना प्रसाद म्हणून शिरा वाटप करण्यात आला. या संपूर्ण सोहळ्यामुळे गावात भक्ती, एकात्मता आणि परंपरेचा सुंदर संगम अनुभवायला मिळाला.
कार्यक्रम यशस्वीरित्या पार पाडण्यासाठी शंकरनगर विकास सेवा सोसायटीचे चेअरमन रामचंद्र गोडसे, संचालक बाळासाहेब पवार, स.म. शंकरराव मोहिते पाटील पतसंस्थेचे व्हा. चेअरमन तुकाराम ज्ञानोबा जाधव तसेच व्यवस्थापक प्रमोद कुंभार, शिवाजी भोसले, अशोक गोडसे यांच्यासह ग्रामपंचायत सदस्य, कर्मचारी व ग्रामस्थांनी विशेष परिश्रम घेतले.
या धार्मिक उपक्रमामुळे गावातील सामाजिक सलोखा अधिक दृढ होत असल्याचे चित्र दिसून आले.
