हुंडाबळी व जबरदस्ती वेश्या व्यवसायासाठी प्रवृत्त; महिलेची अकलुज पोलीसांकडे धक्कादायक तक्रार
महर्षि डिजीटल न्यूज
अकलुज : अकलुज पोलिस ठाण्यात दाखल झालेल्या एका धक्कादायक गुन्ह्याने संपूर्ण परिसरात खळबळ उडाली आहे. अकलुज येथील ४४ वर्षीय विवाहित महिलेने आपल्या पतीसह सासरच्या मंडळींविरोधात अमानुष छळ, हुंडाबळी, धमक्या, तसेच जबरदस्तीने वेश्या व्यवसाय करण्यास प्रवृत्त केल्याचे गंभीर आरोप केले आहेत.
फिर्यादी महिलेच्या जबाबानुसार, तिचे लग्न २ मार्च २०२५ रोजी पुणे जिल्ह्यातील आळंदी येथे प्रविण गजांकुश यांच्यासोबत झाले. लग्नानंतर अवघ्या काही दिवसांतच पतीसह सासरकडून पाच लाख रुपये व दोन तोळ्याचे सोन्याचे मंगळसूत्र आणण्याची मागणी सुरू झाली. ही मागणी नाकारल्याने तिला वारंवार उपाशी ठेवणे, शिवीगाळ करणे, मारहाण व धमकावणे असे प्रकार घडू लागले.
तक्रारीत नमूद करण्यात आले आहे की, पती प्रविण, सासू सुनिता, दीर प्रशांत, जाऊ गौरी, नणंद साक्षी व तिचा पती सुहास यांनी संगनमत करून महिलेवर पैशासाठी सतत दबाव टाकला. एवढेच नव्हे तर, माहेरी अकलुज येथे आणून भावंडांकडून पैसे आणण्यास भाग पाडले. फिर्यादीकडून पूर्वी ४ लाख ६३ हजारांहून अधिक रक्कम काढून घेतल्याचेही आरोप आहेत.
यापेक्षा गंभीर बाब म्हणजे, आरोपींनी तिला मुंबई व रायगड येथे नेऊन घरात डांबून ठेवले आणि वेश्या व्यवसाय करण्यास प्रवृत्त केले. नकार दिल्यावर तिचे हातपाय बांधणे, केस कापणे, शॉर्ट कपडे घालण्यास भाग पाडणे, तसेच प्राणघातक धमक्या देणे अशा अमानुष वागणुकीला तिला सामोरे जावे लागले.
फिर्यादीने आपल्या जबाबात सांगितले की, आरोपींकडून मोबाईल काढून घेण्यात आल्याने तिला बराच काळ पोलिसांकडे तक्रार करता आली नाही. माहेरहून फोन आल्यास स्पीकरवरच बोलावे लागत असल्याने तिला खरी परिस्थिती सांगणे शक्य नव्हते.
या प्रकरणी भारतीय न्याय संहिता २०२३ च्या कलम ८५, १२६(२), ७४, ३५१(२), ३(५) नुसार अकलुज पोलिसांनी गुन्हा दाखल केला आहे. फिर्यादीकडे कॉल रेकॉर्डिंग, सीसीटीव्ही फुटेज आणि आर्थिक व्यवहारांची पुरावे असल्याचे नमूद करण्यात आले आहे.
या घटनेमुळे अकलुज, सातारा व रायगड परिसरात संतापाची लाट उसळली असून, नागरिकांनी आरोपींवर तात्काळ कठोर कारवाई करण्याची मागणी केली आहे.
