अकलाई कॉर्नर जवळ जंक्शन करण्याचे काम सुरू ; अकलूज टेंभुर्णी मार्गावरील वाहतूक बाह्यवळणाने करण्याचे आवाहन

महर्षि डिजीटल न्यूज / सागर खरात 

अकलूज : श्री संत तुकाराम महाराज पालखी महामार्गावरील माळशिरस तालुक्यातील अकलूज – माळीनगर दरम्यान अकलाई कॉर्नर येथे जंक्शन करण्याचे काम सुरू करण्यात आले असल्याने या मार्गावरील वाहतूक बाह्यवळण मार्गे वळविण्यात आले असल्याची माहिती सोलापूर जिल्हा ग्रामीणचे पोलीस अधीक्षक शिरीष सरदेशपांडे यांनी प्रसिद्धीस दिलेल्या जाहीरनाम्याद्वारे दिली आहे.

श्री संत तुकाराम महाराज पालखी महामार्गाचे (एन एच ९६५ जी) काम सध्या प्रगतीपथावर असून माळशिरस तालुक्यातून जाणाऱ्या सराटी ते तोंडले या मार्गाचे काम अंतिम टप्प्यात आले आहे याच मार्गावरील नवजीवन हॉस्पिटल, अकलाई कॉर्नर जवळ जंक्शन करण्याचे काम सुरू आहे. सदरचे काम पालखी सोहळ्या पूर्वी करण्याच्या सूचना जिल्हाधिकारी कुमार आशीर्वाद यांनी दिल्या आहेत. 

त्यासाठी दिनांक 25 जून रोजी सायंकाळी चार वाजलेपासून दिनांक 26 जून रोजी रात्री आठ वाजेपर्यंत हा मार्ग बंद राहणार असून या मार्गावरील वाहतूक बाह्यवळण मार्गे वळवण्यात आली असल्याचे शिरीष सरदेशपांडे यांनी जाहीरनाम्याद्वारे कळविले आहे.

बाह्यवळण द्वारे वळविण्यात आलेला मार्ग पुढील प्रमाणे :- १) अकलूज कडून टेंभुर्णी कडे जाणारी वाहने अकलूज, महाळुंग, 25/4 , लवंग मार्गे टेंभुर्णी कडे जातील तसेच महाळुंग रस्ता, पांढरे वस्ती मार्गे माळीनगर कडे जातील. २) टेंभुर्णी कडून अकलूज कडे येणारी वाहने 25/4 लवंग महाळुंग, बाबरी पुल मार्गे अकलूज शहरात येतील. ३) माळीनगर ते अकलूज व अकलूज ते माळीनगर अशी स्थानिक वाहतूक माळीनगर पांढरे वस्ती मार्गे अकलूज कडे येतील व अकलूज कडून माळीनगर कडे जातील.