मतदान वाढीसाठी तालुका प्रशासन गंभीर, विविध उपक्रमाद्वारे केली जात आहे जनजागृती ; अकलूज नगर परिषदेचा मोलाचा सहभाग
महर्षि डिजीटल न्यूज
अकलूज : मतदानाच्या प्रक्रियेत अधिकाधिक नागरिकांनी सहभाग नोंदवावा, माळशिरस तालुक्याची मतदानाची टक्केवारी वाढावी यासाठी माळशिरस तालुका प्रशासन गांभीर्याने पावले उचलत असून विविध उपक्रमाद्वारे मतदारांची जनजागृती केली जात आहे. यामध्ये अकलूज नगरपरिषदेचा आहे मोलाचा सहभाग असल्याचे दिसून येत आहे.
सध्या देशात व राज्यात लोकसभा निवडणुकीचे वारे वाहत आहे. पहिल्या टप्प्यात झालेल्या मतदानाची टक्केवारी कमी आढळून आल्याने पुढील टप्प्यात मतदानाची टक्केवारी वाढण्यासाठी प्रशासनाने मतदारांची जनजागृती करण्याचा उपक्रम सुरू केला आहे. या अंतर्गत माढा लोकसभा मतदारसंघातील माळशिरस विधानसभा क्षेत्रात मतदानाची टक्केवारी वाढण्यासाठी सहाय्यक निवडणूक निर्णय अधिकारी तथा प्रांत अधिकारी विजया पांगरकर यांच्या मार्गदर्शनाखाली विविध उपक्रम राबवले जात आहेत. यात अकलूज नगरपरिषदेचा आहे मोलाचा सहभाग असल्याचे दिसून येत आहे.
अकलूज नगरपरिषदेचे मुख्याधिकारी दयानंद गोरे यांनी अकलूज नगरपरिषदेच्या वतीने विजयसिंह मोहिते पाटील क्रीडा संकुल येथे मानवी साखळीतून भारताचा भव्य नकाशा तयार केला. याकरिता शिवरत्न क्रिकेट अकॅडमी समरजीत सिंह अकॅडमी साहिल स्पोर्ट्स क्लब नगरपरिषद कर्मचारी पंचायत समिती कर्मचारी तसेच नागरिक अशा सुमारे 500 पेक्षा अधिक नागरिकांनी सहभाग नोंदवला. यावेळी उपस्थितांनी केशरी, पांढऱ्या व हिरव्या रंगाच्या टोप्या परिधान केल्या होत्या त्यातून तिरंगी भारत साकारण्यात आला व 100% मतदान करणे बाबत संदेश प्रसारित करण्यात आला.
यावेळी नागरिकांनी 7 मे रोजी होणाऱ्या मतदानात 100% सहभाग नोंदवून मतदानाची सर्वोच्च टक्केवारी गाठण्यासाठी सहभाग नोंदवावा असे आवाहन मुख्याधिकारी दयानंद गोरे यांनी केले आहे.
